შენ დაგაბრალებ ეჭვების სევდას,
დარდიან მზერას და გრძნეულ ღიმილს,
შენ დაგაბრალებ ჩემს ყველა ცოდვას,
ყველა სადარდელს და ყველა ტკივილს!
შენ დაგაბრალებ ვარდების ოხვრას
და ვარსკვლავების ღვთაებრივ როკვას,
ქარებს, რომლებსაც გაგიფენ ნოხად
ღრუბლებს - წვიმების წვირიან კოკას...
შენ დაგაბრალებ ყველა სიყვარულს
და ყველა ღალატს, თუ თავგანწირვას,
მერე ამ სულის ქათქათა ფურცლებს
შენი ცრემლების წვიმა დაწვიმავს...
შენ დაგაბრალებ ყველა სიკეთეს,
მზეების ციალს და ცის ტრამალებს,
მერე მოვკვდები ძალიან მშვიდად
და ამ სიკვდილსაც შენ დაგაბრალებ!..
მურად მთვარელიძე
No comments:
Post a Comment